Serendipity - Poetry, Articles and Life Stories

Aaj maine tumhe mere khwabon ko, Jeete huye dekha, Jo tumne kabhi socha bhi nahin tha, Woh sab karte huye dekha, Khush toh tum hamesha se hi thhe, Maine tumhe khud se  khush hote huye dekha. Meri kahi huyi baaton ko, Khud ki baatein kehte huye dekha, Aur mujhe Tum par sirf hansi nahin,  Thoda taras bhi aaya, Kyunki tumhara tumse hi faasla, Saaf - saaf nazar aaya. Kaash tumhari tasveeron par likhe, Tumhare hi lafz, sirf lafz na hote, Kaash khud ki talaash mein daudte daudte, Tumhare aas paas ke log istemaal na hote, Ek din yeh daud khatam hogi, Tumhara khokhla sa mukhauta ek din, Saari duniya ke aage jab girega, Tumko khud ka saamna bhi karna padega. Toh jiyo sukoon se, Ki ab mujhko na koi ranjish hai, Bhaago tum apne karmon se, Tumhara hisaab meri khwahish hai, Jo diya hai tumne, woh laut ke aayega, Aur tumhara karma isi zindagi mein milega.

Kal raat jab tumhe Panchtantra ki kahaani suna kar phone par maine sulaaya,  Toh bachpan ka ek dhundhla sa kissa yaad aaya,  Jab yeh kahaani maine ek kitaab mein padhi thi,  Aur iski seekh mere dil mein ghar kar gayi thi,  Tumhare saath chalte chalte main aksar khud se mil jaati hun,  Tumse pyaar karte karte main khud ko thoda aur chahte lagti hun,  Sheher hain alag hamare,  Par meri neendon ka sukoon ho tum,  Sach hai kya, phir se kaho na, Ki sirf mere hi ho tum.  - Medhavi 

Is baar jab hum milenge Khamosh rahenge ya baatein karenge Dekhenge hum jab ek doosre ko Aur jab saath baithenge Toh kya haath pakad ke rakhenge Aur agar saath chale toh Kya hamare haath chuyenge Yeh sab soch main intezaar kar rahi hun Din guzar rahe hain aur main tumhare paas aa rahi hun Main hun shayad paagal, par sirf tumhare liye hun Tumse maanga nahin kuch bas tumhari ban gayi hun Mohabbat ka naam na dena, yeh us se pare hai, Tum subha ka suraj, main bas roshni hun.  Medhavi

Meri kamiyan wo aksar ginwata hai mujhe,  Phir jab ruth jati hun main, Toh kabhi nahin manata woh mujhe, Kehta hai,sach hai,sun lo,samajh lo, Aur aise baatein karta hai, Jaise achche se janta hai mujhe, Mazak bhi sanjeedgi se karta hai woh, Phir kehta hai samajh sakti ho to samjho, Kabhi mushkil kabhi behadh aasaan lagta hai woh, Meri thaki haari zindagi ka araam lagta hai woh, Sochti hun keh dun us se kabhi main bhi, Ki meri kalpanaon ka jeeta jaagta armaan lagta hai woh, Is duniya ka sabse khoobsurat insaan lagta hai woh. Medhavi 

Would you call me crazy if I told you that I miss you? If I tell you that I miss the clasp of your hand,  The depth of your voice filling up my space, Your beautiful eyes & your warm embrace, You walking with me with your hand on my shoulder, You holding my hand to make your hand warmer, The smell of your perfume mixed up with your essence, The sound of your laugh& Your warm breaths caressing my skin, Your soft whispers that reach my soul, Your arms holding me like we were never apart, And your silences that speak out loud. I miss you!

Mujhe ab tumhe paane ki chaah nahin rahi, Tumhe bin paaye itni baar jo khoya,  Ab meri aankhon mein aansoo bhi aate nahin,  Tumhe bin jataaye dil itni baar jo roya,  Hairat ki baat toh yeh hai ki ab tumse koi ummeed bhi nahin,  Bharosa jo tumne Mera itni baar toda,  Bas waqt hai jo guzar raha hai be-aas, na-ummeedi mein,  Kuch is tarah maine tumhara haath chodda.  Medhavi

Maine dekha khwab naya ek, Hamari har mulaqat par, Is baar phir jab jane ka waqt hoga, Kya ruk jaoge tum meri ek baat par, Agar main keh paun tumse, Ki tum meri har raah ki manzil ho, Meri zindagi ka sabse haseen harf, Meri mohabbat ke tum haasil ho. Maine paya khoya tumko, Hamari har mulaqat par, Umeed judi aur tut bhi gayi, Par haq tha meri har aas par, Is baar jab jaane ka waqt hoga, Kya kehne ka koi matlab hoga, Kyunki tum mere nahin ho sakte, Yeh kehte huye tumhe ek pal na lagega. -Medhavi

Woh raat yaad hai tumhe,  Jab hamare bistar upar neeche thhe,  Kamre mein karne ko andhera,  Tumne khidki se parde kheenche thhe,  Sannaatta tha kuch aur phir bhi sadkon ka shor tha,  Ghulti ishq ki khushbu-on ka kaarwaan har oar tha,  Tumhara ek haath mere sirhaane tha,  Jise pakad ke main chain se soyi thi,  Karwatein badalte rahe raat bhar hum,  Par haathon ki chu-an chand ki chakori thi,  Hum dooor thhe kuch par dooori nahin thi,  Aisi humse bandhi jaise ek dori thi,  Aur neend mein bhi mere chehre ne,  Raat bhar muskurahat kahan hi choddi thi. 

Maine dard ki siyaahi  Aaj ashqon se udhaar maangi  Likha sirf tera naam  Aur ek ghazal aisi likh daali Jiske mukhde mein hamari  Pehli mulaaqaat ka mausam tha Aur antre mein hamari  Faasalon ki dastak ka aaghaaz tha Siyaahi khatam na ho saki  Aur Raat yun hi guzar gayi  Tere saath na hone ka ghum  Bujhti sarhadon ko aag deta raha.  - Medhavi  27/01/25 

Tujhe bhoolna itna mushkil kyun hai ?  Is qaid mein ab bhi yeh dil kyun hai ?  Subha shaam mein tera hi zikr kyun hai ? Har zakhm ka marham tera khwaab hi kyun hai ?  Medhavi  18/01/25 Tu mujhe kadwa kar gaya apne meethe dhoke se,  Warna ek waqt tha jab log mujhe chaashni bolte thhe.  Medhavi  18/01/25 Aksar teri tasveeron mein  Teri aankhon ko dekhti hun main Karti hun koshishein ki dikh jaaye Woh dhokha jo us waqt dikha nahin  Medhavi  18/01/25 Teri soorat si lagti hain sab sooratein mujhe,  Teri talaash kabhi khatam hi nahin hoti,  Tu saamne padd gaya agar toh rasta badalna tayy hai lekin,  Phir bhi tujhe nazar bhar dekhne ki talab kam nahin hoti.  Medhavi  18/01/25

Aaj tumhare diye huye jhumke daraaj mein miley,  Toh bas mann hua aur maine woh pehen liye,  Phir aayeene mein dekha khud ko toh na jaane kyun muskurahat aa gayi,  Aur dusre hi pal aankhein nam bhi ho gayin,  Kyunki un jhumkon ki khanak toh pehle si hi thi,  Par ab tasveer kheench ke bhejne ki ab shayad mujhe ijaazat nahin,  Ek waqt tha jab lagta tha ki main tumhari zindagi thi,  Aur dekho, ab tum meri hi zindagi mein nahin.  Medhavi  18/01/25

Meri manpasand jaghon mein, Kyun uske khayaal aaj bhi rehte hain,  Meri manpasand sadkon par,  Kyun uske kadam mere saath aaj bhi chalte hain,  Meri manpasand chaai mein,  Main kyun aaj bhi cheeni uske hisaab se leti hun,  Meri manpasand bus ki seat, Main kyun aaj bhi uske liye khaali rakhti hun, Meri manpasand film dekhte huye, Kyun uska naam le kar main aaj bhi cheezein keh deti hun, Meri manpasand zindagi ko, Main uske jaane ke baad bhi kyun uske hi andaaz se jeeti hun ?  - Medhavi 18/01/25

You just didn't love me enough  Seven years ago when we met,  I didn't know, neither you did,  That our paths will cross again,  And you will fall for someone like me... Someone as broken as I was then,  Tired of love, tired of being unloved.  And we met again when things were worse,  I had put my heart in jeopardy for someone else,  And was shattered but you still held me.  5 years of your patience,  5 years of your love,  But today I want to say that,  You didn't love me enough.  You said you find it hard to express,  And I waited for that one day when you would, You said you'd fight the world for me, And I waited for that one day when you would... You gave up too late,  Or you gave up too early,  I wasn't prepared,  We weren't done,  But between us there were always your demons, And you and your demons never believed in miracles.  Your practicality killed my dream - lit love,  Your pra...

Aaj tumhe maine ek safed kurte mein dekha,  Tumhare bikhre baalon mein maine raat ke dhalte andheron ko dekha,  Us kurte mein maine anginat safed rangon ko dekha,  Thodi barf, thoda aasmaan,  Thodi cheeni, thoda namak dekha,  Ek gulaab, ek hans, Thodi barf, thoda doodh dekha,  Ek kaagaz, ek shankh dekha,  Ek jharnaa aur thoda dhuaan dekha,  Saare safed rang utar aaye meri nigaahon mein,  Jab aaj tumhe maine ek safed kurte mein dekha.  Safed kurta pehna karo,  Achcha lagta hai tum pe.  - Medhavi