woh bhram aaj bhi na toote...

Teri yaadon tak pahunchne ki seedi, har khayaal mujhe baar baar deta hai. Main bhoolna kuch chahti hun tujhko, par phir tera naam har manzar pukaarta hai. Aaj phir main Rajiv Chowk Metro Station ke CCD par ruk gayi. Na jaane kiska intezaar kar rahi thhi. Phir ehsaas hua ki yeh intezaar toh pichle do saal se har baar issi jagah meri aadatein dohraati aayi hain. Kayi baar lagta hai ki teri soorat kuch bhool gayi hun main, par aankhein har baar bandh karne par tera hi chehra saaf saaf nazar aata hai. Main har din kuch aur tujhse mohabbat kar baith-ti hun. Nafraton ki wajahein bahut hain, phir bhi samjhaute kar leti hun. Tujhse mohabbat karna jaise ibaadat si ban gayi hai, jo har roz main khuda se karti hun. Teri khairiyat ki fariyaad aur tujhse akele mein ghanton baatein main aksar karti hun. Tu har jagah, har peher mein mere saath saath chalta hai. Kabhi main ladkhadaati hun toh tera hi haath mujhe pakadta hai. Kayi baar jab main muskura kar peeche palat-ti hun toh teri kami mujhko khalti hai. Main din raat tujhe soch soch zindagi ko aage badhaati hun. Jab jab thak jaati hun, toh teri hi aas khud ko deti hun. Tu aayega, tujhe aana hi hoga, yeh baar baar khud se kehti hun. Phir khuda se sawaal karti hun, mohabbat banaayi kyun agar manzilein adhoori hi chorni thhi. Jawaab dhundh rahi hun kabse, tujhse, khuda se. shikaayatein bhi hain, shikve bhi hain, par lagta hai jab tujhse saamna hoga, toh na jaane kya hoga. Kya main tere saamne se ajnabiyon ki tarah guzar jaaungi, ya pehle ki tarah bas tujhse yun hi baatein kar paaungi? Kya khud par itna ikhtiyaar rahega mujhko, ki tujhse door main uss pal reh paaungi? Kya tera haath phir se pakad kar khud ko yakeen dilaaungi, yeh khwaab nahin, haqeeqat hai, ki tu mere saamne hai aaj? Ya tujhe chhoo kar, aankhein bandh kar lungi, ki yeh khwaab aaj na toote. Mohabbat ka jo bhram liye jiye ja rahi hun, woh bhram aaj bhi na toote.

Medhavi

27-11-14

Comments

Post a Comment

Popular posts from this blog

oas 🌸

Guzre huye lamhon ki oas, Aaj aayeene par jami huyi dekhi,  Gire huye do chaar lafz,  Aur bhulaayi huyi yaadein,  Kuch puraani tasveerein,  Aur dohraayi huyi baatein,  Ehsaas ajnabee to ho Gaye,  Par paraaye nahin,  Mulaaqaat to kehne ko ho gayi,  Par woh laut ke aaye nahin. Intezaar nahin, ummeed nahin,  Na unse mohabbat Hai ab,  Khud se naraazgi hai, nafrat bhi,  Kyun na samajh sake hum tab,  Behte rahe Nadi ki tarah unke jahaan mein, Jo kehte woh maan lete thhe, Aankhein moond Kar hum.  Ab khuli Hain aankhein to tajjub karte Hain,  Is oas par unka naam likh Kar mitaate huye, Hum hum na rahe, waqt badal Gaya magar, Woh na badle, na badli fitrat unki,  Kitni milegi saza us ek faisle ki,  Ki kabhi in nigaahon ne unko chuna Tha, Duniya se jhagad Kar unhe apna banaya tha. Mohabbat jab apni hi nazar mein gunaah ban jaati Hai,  Ek pal mein hausalon ki tasveer toot jaati Hai,  Saans aati Hai magar, jeene ka ehsaas nahin hota,  Zindagi guzarti Hai magar, Waqt nahin guzarta. Medhavi
Read more

ghum 🌸

Kuch ghum ki parchaayi tum par bhi paddi Hum par bhi paddi Kuch dard ki chingaariyaan tumhe bhi jala gayin Humein bhi sulgaa gayin Kuch ashqon ki nami ne tumhe bhi bhigaaya Humein bhi sataaya Sab dil mein utarte jazbaaton ko chhoot-te tumne bhi dekha humne bhi dekha Sab bandhi ummeedon ko toot-te tumne bhi dekha Humne bhi dekha Bas fark itna raha Ki hamara saath na thha Koi aur hamare tha saath khadda Ek sa ghum Ek sa dard Ek sa dhokha Ek sa samjhauta Hum kar aaye khud se aur unse Aur phir hum tum miley bahut kismat se Waqt laga khwaabon ko ek sa karne mein Waqt laga sawaalon ko sulajhne mein Aur ek din humko phir pyaar ho gaya Ek aadhe adhoore shaqs se Tum se...humko pyaar ho gaya Ummeedein bandhti kaise Saari pehle se tooti thhi Neendein khwaabi hoti toh kaise Haqeeqat hi itni jhooti thhi Phir bhi aitbaar karne lage hum Tumse pyaar karne lage hum Shaam savere tujhse juddne lage Aadaton ke tevar badalne lage Neend ko bhi teri aadat si hone lagi Aur ek dor phir khwaab pirone lagi Hum t
Read more

neend 🌸

Neend Badda be - khauff hai dard yeh, Bin dastak aa jaaya karta hai, Ashqon ke libaas odh yeh, Din raat jagaaya karta hai... Aise mein jab Zara si khushi, Parchaayi mein bhi dhundhlaati hai, Ruk jaati hain saansein ab, Jab zindagi yeh muskuraati hai... Aadatein tanhaayiyon ki ab, kisi ke saath ki mohtaaj nahin, Jab aati hain liye koi vaada, toh dil kehta hai aaj nahin... khaamoshi ki lau mom se choo kar Zara si ladkhadaati hai, Jab koi haath pakadta hai toh saath chhootne ka darr badhaati hai, Guzra hua waqt jo ab tak beeta nahin, Usmein thamme huye toote vaadon ki yaad dilaati hai... Ab tum ho zindagi mein toh neend aane se ghabraati hai, Yeh haqeeqat badal Na jaaye kal iss darr mein raat bitaati hai, Neend aa jaaye toh phir khwaab dekhne se bhi ghabraati hai, Yeh khwaab Na toot jaaye iss darr mein kahan neend aati hai.... Medhavi
Read more