ghum 🌸

Kuch ghum ki parchaayi tum par bhi paddi

Hum par bhi paddi

Kuch dard ki chingaariyaan tumhe bhi jala gayin

Humein bhi sulgaa gayin

Kuch ashqon ki nami ne tumhe bhi bhigaaya

Humein bhi sataaya

Sab dil mein utarte jazbaaton ko chhoot-te tumne bhi dekha humne bhi dekha

Sab bandhi ummeedon ko toot-te tumne bhi dekha

Humne bhi dekha

Bas fark itna raha

Ki hamara saath na thha

Koi aur hamare tha saath khadda

Ek sa ghum

Ek sa dard

Ek sa dhokha

Ek sa samjhauta

Hum kar aaye khud se aur unse

Aur phir hum tum miley bahut kismat se

Waqt laga khwaabon ko ek sa karne mein

Waqt laga sawaalon ko sulajhne mein

Aur ek din humko phir pyaar ho gaya

Ek aadhe adhoore shaqs se

Tum se...humko pyaar ho gaya

Ummeedein bandhti kaise

Saari pehle se tooti thhi

Neendein khwaabi hoti toh kaise

Haqeeqat hi itni jhooti thhi

Phir bhi aitbaar karne lage hum

Tumse pyaar karne lage hum

Shaam savere tujhse juddne lage

Aadaton ke tevar badalne lage

Neend ko bhi teri aadat si hone lagi

Aur ek dor phir khwaab pirone lagi

Hum tum sang poore hone lage

Par tum lekin adhoore hi rahe

Kuch tum mein badla nahin

Meri waffa ka suroor chadha nahin

Humein pyaar hota gaya

Tumhe pyaar hua hi nahin

Tum dil mein utarte gaye

Par ishq ne tumhe chua bhi nahin

Iss se baddi maat kya hoti

Ki tumhe jeet-te jeet-te khud ko haar baithe

Ab tum bhi ho kishton mein kuch kuch hamare

Aur aaj humse wahi sawaal kar baithe..

Kyun karte hain pyaar

Kabhi samajh sakenge toh jataayenge

Abhi itna gaur karna

Ki tumse bewaqt be dastoor milne zaroor aayenge

Medhavi Medz

28.11.15