Serendipity - Poetry, Articles and Life Stories

Meri zindagi mein agar teri maujoodgi yun hi rahe,  Mohabbat mein koi bojh na ho aur saadgi yun hi rahe,  Toh ghum ko shayad mere zehen ka pata hi na miley,  Aur justajoo har din sirf tere liye hi rahe !  I love you ♥️

Ek din usne kaha,  Ki shayari tumhari badnaam karti hai mujhe, Burre waqt ke sirf ilzaam deti hai mujhe,  Par woh bhool gaya,  Par woh bhool gaya,  Ki uske naam jo nazmein likhi thi,  Jo ghazalein likhte meri raatein na thakti thi,  Woh usne kabhi padhi nahin,  Ya shayad padhi bhi toh samjhi nahin,  Usay sirf ilzaam yaad rahe,  Meri mohabbat nahin, Usay bas badnaami ka darr tha,  Mujhe khone ka nahin,  Ab main likhti hun pehle ki tarah,  Kyunki ab woh meri shayari padhta nahin,  Sahi bhi hai uske liye, Kyunki ab yeh kaagaz uske lafzon se sajta nahin, Adhoora hai har lafz bhi meri zindagi ki tarah,  Par chalo ek dilaasa hai, Ki meri tarah koi ussay mohabbat kar sakta nahin.  - Medhavi  Nov 3, 22

Woh shayad na padhe yeh shayari meri kabhi, Par usko amar mere lafz karte rahenge,  Saath jeene ki kasam usne yun hi todd di toh kya, Hum har din zara aur us par marte rahenge... - Medhavi Nov 3, 22

Yeh puchta hai aksar woh mujhse,  Ki kisi ek hi shaqs se, Kayi baar mohabbat kaise ho sakti hai, Main hans kar bas usay aayeena dikha deti hun. - Medhavi Nov 3' 22

Yeh puchta hai aksar woh mujhse,  Ki kisi ek hi shaqs se, Kayi baar mohabbat kaise ho sakti hai, Main hans kar bas usay aayeena dikha deti hun. - Medhavi Nov 3' 22

Sheeshe ke makaan par, Dhokhe ke pathar jo padde, Toote huye tukde bhi,  Sach ke jhooth hone ki, Fariyaad karte rahe... Koi tukde ek saath rakh bhi dega, Par naya sheesha laana hi padega, Kyunki Toota hua kaanch,  kuch der bhi na tikega... Koi maang le maafi kitni bhi,  Tukde pairon mein toh chubhenge, Toote tukdon ko aur toddne ki, Hum ijaazat phir se kyun denge ? - Medhavi Nov 1, 2022

Kya tum bhi... Kya tum bhi meri tarah yeh baatein sochte ho,  kaise honge woh din aur raatein sochte ho,  jab waqt ki koi paabandi Na hogi,  mulaaqaaton ki umrein lambi hongi,  Jab har khayaal likh ke bataana Na padega, Aur doooriyon se pyaar jataana Na padega... Kya tum bhi meri tarah yeh baatein sochte ho,  kaise honge woh din aur raatein sochte ho, Jab hum har waqt ka khaana saath khaayenge, Aur bin soche bas kahin bhi nikal jaayenge, Jab saath baith kar ghanton yeh chaand takenge, Aur phir pehle ki baaton par pehli baar sa hansenge... Yeh baatein sochte sochte  ek ek din main guzaar rahi hun, Tumse milne ka har waqt  main intezaar kar rahi hun, Dekho aaj ek aur din kam ho gaya, Hamari mulaaqaat ka waqt kareeb aa gaya, Yahi soch kar muskura rahi hun  main meelon dur tumse, Yahi soch kar phir  khwaab bun rahi hun jodd ke tumse... Medhavi